شعر دفتریم
باش یازی
+0 یازیمی سئودین می؟
سلاملار سایقی لار تورک یولداشلاریما
دوستلار گؤردویونوز کیمی بو وئبلاق منیم شعر دفتریم دی
یازدیغیم شعرلری سیزینله پایلاشیرام و سیزدن ایستیرم منه یاردیم ائدیب باخیشلارینیزی یازاسیز
اؤز حاققیمدا معلومات:
من آرزو یارالی تورپاق شعره ماراغی اولان بیر گنجم
آما اوستادیم یوخدو کی بو حاقدا منه یاردیم ائده
سیز عزیز دوستلاریمدان ایستیرم یالنیشلاریمی منه دئییب منه یاردیمجی اولاسیز
بوراجان قیرخ شعریم وار کی چالیشاجاغام تئزلیکله وبلاقا یئرلشدیرم و شعر یازدیخجا دا چالیشاجاغام سیزینله پایلاشام
منیم وئبلاقیمی ایزلیین و منی تک قویمایین
بؤلوم : ürәk sözü یازار : آرزو یارالی تورپاق 0 باخیش
دوقوزونجو شعر
+0 یازیمی سئودین می؟
گیلئیلی یم سویداشلاردان خالقیمدان
ایستیرم کی من سوروشام اونلاردان
نه واخت اولار بیر دانیشاق بیر گولک؟ نه واخت اولار بیر بیریمیزی سئوک؟
ندن بیزلر اؤزگه کیمی قالمیشیق؟
اؤزگه لری اؤزموزدن چوخ آنمیشیق؟
نئیچون وطن ناله سینی دویماریق؟
نئیچون بیرلیک ده شنلیک یاراتماریق؟
اؤزگه دیله دانیشاریق هر زمان
اؤزگه سازییلا اویناریق هر مکان
اوتانیریق دیلیمیزی دانیشاق
ماراق یوخدو کئچمیشی ده یوخلویاق
هامینین کئچمیشینی آختارمیشیق
آنجاق اؤز کئچمیشیمیزی دانمیشیق
ندن باجیم ،تورک دانیشماق پیس اولسون؟
ندن قارداش، حاققی آلماق پیس اولسون؟
سوروشورام، مگر سن تورک دئییلسن؟
بوندان باشقا نه تانری دان ایستیرسن؟
دئییبلر کی نه موتلو تورکم دئین
ئاش قالدیریب اؤزلویوندن سؤیله ین
سن ده گوون دامارداکی قانینا
امینلیک له وئر قولو یولداشینا
خالقیم گلین هاممیمیزدا بیر اولاق
حاق ایسته ییب حاققی آلانلار اولاق
گلین بیرده بیربیرمیزدن قورخمایاق
آزادلیغی آلمایینجا دورمایاق
گیلئیلی یم دوستلاردان قانداشلاردان
اوسانمیشام ساتقینلاردان ساتمیشدان
یولداشلاریم بیر بیر اوزاقلاشیرلار
یاری یولدا منی تک بوراخیرلار
هر کیم گؤرور حاق ایستیرم چکیلیر
حیس ائدیر کی میللتچی یم ایتیلیر
اوزاق دورور کی یانماسین اودوما
قورخور یانار اورک اونو یاندیرا
"تورپاغ "یمیز دوشوب آیاق آلتینا
کیمسه سی یوخدو چاتا ایمدادینا
بؤلوم : şeir یازار : آرزو یارالی تورپاق 2 باخیش
سکگیزینجی شعر
+0 یازیمی سئودین می؟
شور گؤلوم ای اورمو گؤلوم هارداسان؟
ایتیلمیسن یا باشقا دیارداسان؟
ندن کؤچدون آتا بابا یوردوندان؟ اولما گئدیب گزمک خیالینداسان؟
سسلییرم اورمو منه بیر سس وئر
اولما منله گیزلن پالانج اوینورسان
آختاریرام اورمو گؤرمورم سنی
چیممه یه گلمیشم قوجاق آچمیرسان؟
چوخلو آختاردیم سنی من تاپمادیم
باخاندا هر یئر دوز دو سن هارداسان؟
بیر بالاجا سو گؤرورم گؤز یاشی
آز در او،کسرینی هارا قویموسان؟
بونلاری سؤیله دیم اورمو گؤلونه
دئدی منه چوخداندی،سن یاتمیسان
مندن اولان قالان ائله بو سو دو
بو گون صاباح اونو دا تاپامماسان
منیم گلن سولاریم کسیلیبدی
اینان من اؤلسم سن یاشایامماسان
سو سوز قالدیم دئمکله سو وئریلمز
واختیم بیتیر،قانیمی آلامماسان
بیر ایش گؤرسن آنجاق ایندی چاغیدی
ایندی دورسان، صاباح آغلایامماسان
"تورپاق "اؤزؤ دوزلا ساریلدی بوتون
یوردون اؤلوسون، دا ساغالدامماسان
بؤلوم : şeir یازار : آرزو یارالی تورپاق 0 باخیش
یئتدی اینجی شعر
+0 یازیمی سئودین می؟
باغریم یارادیر آجیشیر
گؤزومدن سولاریم داشیر
سوسوزلوق یادیما دوشور
کدرلر منله باریشیر
گؤلوم اولوب دوزلا دولو
سو گؤرمورم هانی سویو؟
گؤل دئیردیم سولو یئره
آنجاق بوردا واردی دوزو
دئدیم سو ایچمه یه جیم
سو ایچمه سه منیم آنام
سوسوزلادیم بیتدی آمان
اورمو دئدی سو ایچ بالام
منیم او مهریبان گؤلوم
دئییر آجیشیری گؤزوم
قورتارمیشام سون نفس دی
کئشکه بو یایی دا گؤروم
قوجاغیندا اوزدویوموز
سئوینجی پایلاشدیغیمیز
ایستمه دی بیزی بوغا
دیزینه باش قویدوغوموز
ایندی دوداغی قورویوب
یاراسی دوزلارلا دولوب
یاغی پارچالاییر دوزون
اورمو گؤلوموز قورتالیب
اورمو بیزی باغیشلاما
بیزی دا ائولادین سانما
هئچ گلمیریک گؤرک اونو
بیرده آلما قوجاغینا
اورمو دئییر من اؤلورم
آنجاق بونا کؤورلیرم
من اؤلسم اؤنملی دئییل
یوردون اؤلومون گؤرورم
مندن سونرا بو آغ کفن
بورویه جک بوتون وطن
ائولادلاریم نئله یه جک
گؤرسه باتیب دوزا وطن؟
ایگید بالام دور آیاغا
سس وئر آنا هارایینا
بیر بالا یوخ سو گتیره
سوسوز قالان آناسینا؟
سو ایستمک یاساق اولوب
اورمو گؤلو دوزلاق اولوب
"تورپاق "عشقی داها اؤلوب
ایستی اورک بوزلاق اولوب
بؤلوم : şeir یازار : آرزو یارالی تورپاق 3 باخیش
آلتی اینجی شعر
+0 یازیمی سئودین می؟
آغ گونلر نه قدر قارا اولسا
قانلی کؤنلوم نه قدر یارا اولسا
دلی سسیم نه قدر اوجا اولسا
صبریم کسیلیب باشیم ایمه رم من
دردیم کؤکوندن دواسیز اولسا
کؤنلوم یئریندن صفا سیز اولسا
شعریم ازلدن معناسیز اولسا
آغریم چوخ اولوب ناله ائتمه رم من
آصلان تک قولومدا گوجوم اولسا
قارتال تک گؤزومده گؤروم اولسا
آشیق تک دیلیمده سؤزوم اولسا
یولا دوشوب بیر دم دایانمارام من
ائلیم آیاق آلتدا ازیلمیش اولسا
سسیم بوغازیمدا کسیلمیش اولسا
یانار اودلاردا یاندیریلمیش اولسا
"تورپاغ "یمی آتیب اونودمارام من
بؤلوم : şeir یازار : آرزو یارالی تورپاق 0 باخیش
بئش اینجی شعر
+0 یازیمی سئودین می؟
نفسیم آغیر گلیر
هردن ده بیر کسیلیر
یوللار قارشیمدا اوزاق
گئتدیکجه ده اوزانیر
گل سسیمه بیر سس وئر
نفسیمه نفس وئر
دار گونومده یولداش اول
گله جیه هوس وئر
ایستدیم کی دوشونم
اودلاردا من بورونم
یولدان آییردی منی
یومدوم گؤزو گؤرمه یم
تانیش اولدوم یاد ایله
اؤزگه اولدوم جان ایله
دؤنوب آرخاما باخدیم
یولداش باتیب قانیله
صاباحیم دومانلی دی
داغ اوستو تک قارلی دی
گؤرمورم ایشیق یولو
بلکه قاپی باغلیدی
نئجه دئییم دویموشام
حیاتدان سییریلمیشام
کدر باتلاغیندایام
هاممیدان یورولموشام
آدیمی مندن آلدی
"تورپاغ "یمی تالادی
دوننیمی ایتیریب
یانار اودلارا سالدی
منسه یاتان دئییلم
آی تک باتان دئییلم
ایشیق لیغا چاتماسام
من دایانان دئییلم
بؤلوم : şeir یازار : آرزو یارالی تورپاق 0 باخیش
دؤردونجو شعریم
+0 یازیمی سئودین می؟
اورمو گؤلوم گؤر نئجه عطشان قالیب
دوز یارانین اوستونو گؤر نه آلیب
قیش گؤنؤ دؤر قار یاغیر گؤر نه آغیر
قوی یاغا قار بلکه یارانی ساریر
اؤرک دؤزمور ،کدرلر قورتولارمی؟
بولود آلتدان قیزیل گؤن آچیلارمی؟
یانیر اؤرک دیلیم یوخدو دانیشیم
سسین گلسین قوی سسینله آلیشیم
یئتیر منه اؤزگورلویون سؤزونو
گؤروم بلکه ائلین گولر اوزونو
باخ گؤر نئجه قارانلیقدا قالمیشام
غم اودوندا گؤر نئجه من یانمیشام
گون گلر کی "تورپاغ"یمیزی آلاق
اولار اوجا داغلاردا بیز هایکیراق
اؤزگورلویو الده ائدیب آلاریق
گؤزل، آیدین گله جیه باخاریق
بؤلوم : şeir یازار : آرزو یارالی تورپاق 2 باخیش
اوچونجو شعریم
+0 یازیمی سئودین می؟
قارا باخان
سویوقوندان اؤیود آلار
گؤرور کی او آیاق آلتیندا ازیلیر
گؤزللیغی بیر یانا دیر
اریمه یه تئز ارییر
سن نئجه سن؟
یوخسا قارسان؟
دئدیم سنه ،قار ارییر
سویوق اولما،سن گونش اول
سنسه اریت بو قارلاری
دایانما، یان، اود کیمی اول
اود ایستی سی قار اریدیر
قارا گؤنلره ایشیق اول
یلرالارا سن مرحم اول
آغریلاری سسین کسیر
سویوق"تورپاغ"ین کؤکسونه
گونش کیمی ایستی ساچ
گؤر باغرینین بوزو اریر
بؤلوم : şeir یازار : آرزو یارالی تورپاق 0 باخیش
ایکینجی شعریم
+0 یازیمی سئودین می؟
باخدیم اوجا داغ داشا
چئوریلدیم بیر یولداشا
آختاردیم آیدینلیغی
یوللاردا داشدان داشا
گاه یئریدیم گاه قاچدیم
گاه دایانیب من باخدیم
یول اوزوندور دئمیشدیم
گئتدیکجه بیتمز ساندیم
قارداش یولداش چکیلدی
الیم یازماغی سئودی
یول اوسته بیر قوش گؤردوم
اودا اوچوب ایتیلدی
عزیزیم تکی سن گول
آغلاییم من کی سن گول
اریدین بیر شمع کیمی
ساغ اولسون باشین سن گول
آرخانجا بویلانمیشام
یوللارینا باخمیشام
آت چاپاراق گلمیشم
آلیشمیشام یانمیشام
سنسیز قالانماز منم
گولسوز اولانماز منم
بیرجه بولبولون اولوب
باغیندان دؤنمز منم
دیلبم آغزیمدا اود دو
یانیب یولومو توتدو
اود توتوبدا یانیردیم
یانار اودا سو توتدو
بیر قوش کیمی اوچارام
قاناد چالیب چاتارام
"تورپاق"ا باش قویوب دا
باشقالاری آتارام
بؤلوم : şeir یازار : آرزو یارالی تورپاق 0 باخیش
ایلک شعریم
+0 یازیمی سئودین می؟
بیر گون دوررام اوجادا
سسله یرم هارایا
یئتیشمیشم آرخایین
باخیرام من یولوما
سن دئمه کی نه اولور؟
یئتیشمه سن کی منه
گؤزلرینی یومارسان
آچاندا من قارشیندا
گلرم سسلرم سنی
گؤررسن اوردایام من
اؤنوندیم من آرتیق
یئتیشمیشم سانایا
ایشیق گونلره باخیب
ساعاتلاری من ساییب
امین اول کی اولاجاق
آیدینلیقلار یولومدا
داینمارام دورمارام
یول دؤیه رک گلرم
دیزیم یورولماز منیم
آماجیمین یولوندا
اینان کی من هر زامان
آلدیم "تورپاق"آغریسین
آمما سسیم سوسوبدو
بیر یارالی بوغازدا
بؤلوم : şeir یازار : آرزو یارالی تورپاق 2 باخیش