دوقوزونجو شعر

پنجشنبه 29 مرداد 1394

+0 یازیمی سئودین می؟
گیلئیلی یم سویداشلاردان خالقیمدان
ایستیرم کی من سوروشام اونلاردان
نه واخت اولار بیر دانیشاق بیر گولک؟ نه واخت اولار بیر بیریمیزی سئوک؟
ندن بیزلر اؤزگه کیمی قالمیشیق؟
 اؤزگه لری اؤزموزدن چوخ آنمیشیق؟
نئیچون وطن ناله سینی دویماریق؟
نئیچون بیرلیک ده شنلیک یاراتماریق؟
اؤزگه دیله دانیشاریق هر زمان
اؤزگه سازییلا اویناریق هر  مکان
اوتانیریق دیلیمیزی دانیشاق
ماراق یوخدو کئچمیشی ده یوخلویاق
هامینین کئچمیشینی  آختارمیشیق 
آنجاق اؤز کئچمیشیمیزی دانمیشیق
ندن باجیم ،تورک دانیشماق پیس اولسون؟
ندن قارداش، حاققی آلماق پیس اولسون؟
سوروشورام، مگر سن تورک دئییلسن؟
بوندان باشقا نه تانری دان ایستیرسن؟ 
دئییبلر  کی نه موتلو تورکم دئین
ئاش قالدیریب اؤزلویوندن سؤیله ین
سن ده گوون دامارداکی قانینا
امینلیک له وئر قولو یولداشینا
خالقیم گلین هاممیمیزدا بیر اولاق
حاق ایسته ییب حاققی آلانلار  اولاق
گلین بیرده بیربیرمیزدن قورخمایاق
آزادلیغی آلمایینجا دورمایاق
گیلئیلی یم دوستلاردان قانداشلاردان
اوسانمیشام ساتقینلاردان ساتمیشدان
یولداشلاریم بیر بیر اوزاقلاشیرلار
یاری یولدا منی تک بوراخیرلار
هر کیم گؤرور حاق ایستیرم چکیلیر
حیس ائدیر کی میللتچی یم ایتیلیر
اوزاق دورور کی یانماسین اودوما
قورخور یانار اورک اونو یاندیرا
"تورپاغ "یمیز دوشوب آیاق آلتینا
کیمسه سی یوخدو چاتا ایمدادینا


آچار سؤزلر : تورکجه شعر, بیرلیک, تورکی شعر, آنا دیلی, تورک ائلی, آزربایجان ائلی,


بؤلوم : şeir یازار : آرزو یارالی تورپاق 2 باخیش

یئتدی اینجی شعر

سه شنبه 27 مرداد 1394

+0 یازیمی سئودین می؟
باغریم یارادیر آجیشیر
گؤزومدن سولاریم داشیر
سوسوزلوق یادیما دوشور
کدرلر منله باریشیر
گؤلوم اولوب دوزلا دولو
سو گؤرمورم هانی سویو؟
گؤل دئیردیم سولو یئره
آنجاق بوردا واردی دوزو
دئدیم سو ایچمه یه جیم 
سو ایچمه سه منیم آنام
سوسوزلادیم بیتدی آمان
اورمو دئدی سو ایچ بالام
منیم او مهریبان گؤلوم
دئییر آجیشیری گؤزوم
قورتارمیشام سون نفس دی
کئشکه بو یایی دا گؤروم
قوجاغیندا اوزدویوموز
سئوینجی پایلاشدیغیمیز
ایستمه دی بیزی بوغا
دیزینه باش قویدوغوموز
ایندی دوداغی قورویوب
یاراسی دوزلارلا دولوب
یاغی پارچالاییر دوزون
اورمو گؤلوموز قورتالیب
اورمو بیزی باغیشلاما
بیزی دا ائولادین سانما
هئچ گلمیریک گؤرک اونو
بیرده آلما قوجاغینا
اورمو دئییر من اؤلورم
آنجاق بونا کؤورلیرم
من اؤلسم اؤنملی دئییل
یوردون اؤلومون گؤرورم
مندن سونرا بو آغ کفن
بورویه جک بوتون وطن
ائولادلاریم نئله یه جک
گؤرسه باتیب دوزا وطن؟
ایگید بالام دور آیاغا
سس وئر آنا هارایینا
بیر بالا یوخ سو گتیره
سوسوز قالان آناسینا؟
سو ایستمک یاساق اولوب
اورمو گؤلو دوزلاق اولوب
"تورپاق "عشقی داها اؤلوب
ایستی اورک بوزلاق اولوب


آچار سؤزلر : شعر, شعر ترکی, تورکی شعر, تورکجه شعر, آنا دیلی, یئنی سؤز, وطن, ائل سؤزو,


بؤلوم : şeir یازار : آرزو یارالی تورپاق 3 باخیش

آلتی اینجی شعر

سه شنبه 27 مرداد 1394

+0 یازیمی سئودین می؟
آغ گونلر نه قدر قارا اولسا
قانلی کؤنلوم نه قدر یارا اولسا
دلی سسیم نه قدر اوجا اولسا
صبریم کسیلیب باشیم ایمه رم من
دردیم کؤکوندن دواسیز اولسا
کؤنلوم یئریندن صفا سیز اولسا
شعریم ازلدن معناسیز اولسا
آغریم چوخ اولوب ناله ائتمه رم من
آصلان تک قولومدا گوجوم اولسا
قارتال تک گؤزومده گؤروم اولسا
آشیق تک دیلیمده سؤزوم اولسا
یولا دوشوب بیر دم دایانمارام من
ائلیم آیاق آلتدا ازیلمیش اولسا
سسیم بوغازیمدا کسیلمیش اولسا
یانار اودلاردا یاندیریلمیش اولسا
"تورپاغ "یمی آتیب اونودمارام من


آچار سؤزلر : آنا دیلی, آنا توپراق, آنا یوردوم, دیل, وطن, تورکجه شعر, تورکی شعر, شعر ترکی, شعر, آزربایجانی شعر,


بؤلوم : şeir یازار : آرزو یارالی تورپاق 0 باخیش

ایلک شعریم

سه شنبه 30 تیر 1394

+0 یازیمی سئودین می؟
بیر گون دوررام اوجادا  
سسله یرم هارایا
یئتیشمیشم آرخایین
باخیرام من یولوما
سن دئمه کی نه اولور؟
یئتیشمه سن کی منه
گؤزلرینی یومارسان
آچاندا من قارشیندا
گلرم سسلرم سنی
گؤررسن اوردایام من
اؤنوندیم من آرتیق
یئتیشمیشم سانایا
ایشیق گونلره باخیب
ساعاتلاری من ساییب
امین اول کی اولاجاق
آیدینلیقلار یولومدا
داینمارام دورمارام
یول دؤیه رک گلرم
دیزیم یورولماز منیم
آماجیمین یولوندا
اینان کی من هر زامان
آلدیم "تورپاق"آغریسین
آمما سسیم سوسوبدو
بیر یارالی بوغازدا


آچار سؤزلر : شعر, تورکی شعر, شعر ترکی, آزربایجانی شعر, یئنی شعر, تورکجه شعر, آزربایجان, آنا دیلی, تورک دیلی,


بؤلوم : şeir یازار : آرزو یارالی تورپاق 2 باخیش

1 |

 

بلاگا گؤره

    عزیز دوستلاریم سلام من بو وئبلاقدا اؤز شعرلریمی یازاجاغام سیزدن ایستیرم باخیشلارینیزی یازیب منیم یالنیشلاریمی خاطیرلایاسیز ندن کی من عروض قافیه ده دئماق اولار کی هئچ نه بیلمیرم اؤیرتمنیم ده یوخدو کی اوندان اؤیرنم سیزین باخیشلارینیزا احتیاجیم وار ساغلیغینیزی آرزولورام سئوگیرریمله آرزو یارالی تورپاق


سایغاج